شد الحزام على وسطك غيرة ما يفيدك
لابد عن يوم هيجى ويعدلها سيدك
وان كان شيل الحمول على ضهرك يوم هيفيدك
اهون عليك يا حر من مدت ايدك
دى كلمات سيد درويش فى اغنية كلنا عارفينها
لكن احب اقول للاستاذ سيد درويش انى نفذت نصايحك وشديت الحزام على وسطى على امل انها تتعدل
لكن من كتر شدى للحزام فى كل مرة ترتفع فيها الاسعار الحزام اتقطع ومعدش نافع
وخد عندك
كيلو اللحمة 40 جنيه
الفرخة 25 جنيه
ازازة الزيت 11
ازازة الخل 7 جنيه
علبه السمنه 20 جنيه
كيلو العدس 7 جنيه
كيلو الفول 6 جنيه
كيلو الطماطم 3 جنيه
كيلو البصل 3 جنيه
كيلو الخيار 5 جنيه
كيلو الليمون 3 جنيه
كيلو الدقيق 3.5 جنيه
كيلو اللبن 5,5 جنيه
كيس لمكرونه 6 جنيه
كيلو الرز 5 جنيه
كيلو السكر 4 جنيه
كيلو الموز 3,5 جنيه
كيلو الجبنه البيضا22 جنيه
كيلو الجبنه الرومى 44 جنيه
كارتونة البيض 15 جنيه
وكمان عندك مواد البناء واللى عاوزة بوست لوحدها وتثبيت سعر الحديد عن 5100 هو الراجل قال مش هينزله عن 5100 لكن مقلش انه مش هيزوده
حمدان:اطبخى يا بهيه
بهية: اطبخى يا بهية كلف يا حمدان
حمدان: سيبك من اللحمة والحاجات اللى بتوجع البطن دى اعمللنا فرخة وحبه رز
بهيه:هات 30 جنيه
حمدان:ليه ؟ اومال لو قلتلك هاتيلى سمك ورزهتعملى اية ؟
بهية:هقولك هات 20 جنيه
حمدان:خلاص تعالى نقضيها عدس
بهية:انت بتتكلم عن العدس كدة وكأنه اكل الغلابه اللى زينا
(ارتفاع سعر الفول والعدس وخروجهم من قائمة طعام الفقراء)
حمدان: هو الاكل غلى كدة ليه يا بهية ولا انا اللى مش حاسس بالدنيا
(ارتفاع الاسعار بنسبه 166% من سنه 2005 الى2008)
انا المرة دى مش مع الشعب الظالم المفترى انا مع الحكومة التى لا حول لها ولا قوة وعشان الحكومة تهمنى اكتر من الشعب الطماع ده
انا مع الحكومة اللى بتقولنا انتو عندكم موبيلات واجهزة كومبيوتر فى بيوتكم وبتروحو مطاعم يبقى معاكم فلوس يبقى تستغنواعن الحاجات دى وتحاربو الاسعار بلا تكنولوجيا بلا تقدم بلا نيلة
مع اننا من حقنا اكل وشرب وتحضر ومعرفة للتكنولوجيا
انا بحذر الحكومة وبقول ان اى فساد الناس عرفته دايما بيحاول يسد بق الشعب عشان يعرف يسرق براحته وميخليش الشعب يتكلم عن الفساد
يعنى بيدوها كبسه ورز ولحمه وفراخ وملاهى زى دريم بارك وبرامج من نوعية ميلودى تتحدى الملل وخلينا نايمين فى العسل
لكن انتم عديتوا اى مستوى فساد ظالم الناس تعرفه
وانا بحذر وبقول حذاااااااااارى من ثورة الجياع
حذارى من الجعان لو طلع فى ثورة ومفيش وراه اللى يخسره
حذارى يا حكومة حذارى يا حكومة
لكل وزير او امين لجنة سياسات ويا ريس
حافظو على كراسيكم
مغصة الجوع اقوى من تعذيبات المعتقلات
محدش هيهمه الجيش ولا الشرطة لو جاع
هتقتله؟ الموت ارحمله من انه يعيش جعان فى بلده على الاقل عمره ما هيجوع تانى
هتورولهم العين الحمرا؟ وهتطلعو قوات الامن المركزى؟
طظظظظظظظظظظظظظظظظظظظظظظظ
ولا هيعملو حاجة ساعتها ما هما كمان مصريين وجعانين واهلم شقيانين زيهم واكتر ومش هيضربوا فى اللى حاله من حالهم بالعكس دة ممكن يستخدمو قوتهم وسلاحهم ضدكم ومش هتكون اول مرة تحصل فى مصر
هتقولوا ما احنا عاملين رقابه والدقيق مش بيتوزع فى السوق السودا؟ احب اقولكم ان الرقابه بتنصص مع بتوع المخابز وغيرهم وعلى عينك يا تاجر
الجعان بركان وقوة وطوفان مش هتقدروا تقفوا قدامه لو ثار
وبهانه وحمدان مش هيصبروا كتير ومش هيقدروا يشاركوا فى فيلم بطل للنهاية اللى كل محدودى الدخل بيمثلو فيه
هما صبرو بقليلهم ورضيوا لكن قليلهم مش راضى بيهم وبيتأمر
طب اعتبرونا فلسطينين وحنو علينا من فضلكم واكلونا
ولا اعتبرونا يهود حتى وبيعولنا الحديد بسعر ارخص خلونا نبنى ونلاقى حته نعيش فيها
شكلنا كدة محتاجين ثورة من اجل التغيير
هيجى البنى ادم الرخم والرزل والغبى بتاع كل مرة اللى انتو عارفينه ويسألنى هو احنا هنحتاج ثورة كل كام سنه عشان حال البلد ينصلح يا موزمازيل؟
هقوله مش هعلق على موضوع موزمازيل المرة دى لكن هقولك لاول مرة متبقاش غبى ويمكن كلامك فعلا المرة دى صح
وكدة يا حكومة الشعب بيقول لجيشك والشرطة لما تخوفيهم بيهم
كلمة عبقرية من حرفين لكنها ابلغ من الف مقال طظظظظظظظظ
انا كدة خلصت اللى عندى ونبهتك يا حكومة يا غالية على قلبى
مع انى عارفة انى بضغط عليكى وبرهقك بطلباتى لكن للاسف البد بلدكم ياللى ماسكين الحكومة واحنا ضيوف هنا فى البلد اللى تقريبا واحنا صغيرين قالو عليها بلدنا لكن مش عارفة اطلب من مين غيرك يا حكومة واحنا عبيد احسانك
واخيرا اقروا القصيدة دى لاحمد فؤاد نجم_وشكرا للدكتور اشرف حمدى اللى لفت نظرى ليها
هما مين و إ حنا مين .. ؟
هما الأمرا و السلاطين ..
هما المال و الحكم معاهم ..
و إحنا الفقرا المحرومين
حزر فزر شغّـل مخك
شوف مين فينا بيحكم مين ؟!!
..............
إحنا مين و هما مين ..
إحنا الفعلا البنايين
إحنا السنة و إحنا الفرض
إحنا الناس بالطول و العرض
من عافيتنا تقوم الارض ..
و عرقنا يخضر بساتين
حزر فزر شغل مخك
شوف مين فينا بيخدم مين ..؟؟!!
................
هما مين و إحنا مين ؟؟
هما الامرا و السلاطين
هما الفيلا و العربية
و النساوين المتنقية
حيوانات استهلاكية
شغلتهم حشو المصارين
حزر فزر شغل مخك
شوف مين فينا بياكل مين ..؟؟!!!
....................إحنا مين و هما مين
إحنا قرنفل على ياسمين
إحنا الحرب : حطبها و نارها
و إحنا الجيش اللي يحررها
و إحنا الشهدا بكل مدارها
منكسرين أو منتصرين
حزر فزر شغل مخك
شوف مين فينا بيقتل مين ..؟؟!!!
................
هما مين و إحنا مين
هما الامرا و السلاطين
هما مناظر بالمزيكا
و الزفة و شغل البوليتيكا
و دماغهم طبعاً استيكا
بس البركة بالميازين
حزر .. فزر شغل مخك
شوف مين فينا بيخدع مين ..؟؟؟!!!
.....................
هما مين و إحنا مين
هما الامرا و السلاطين
هما بيلبسوا أخر موضة
و إحنا بنسكن سبعة في أوضة
هما بياكلوا حمام و فراخ
و إحنا الفول دوخنا و داخ
هما بيمشوا بطيارات
و إحنا نموت بالاوتوبيسات
هما حياتهم بامب جميلة
هما فصيلة و إحنا فصيلة
حادي يا بادي يا عبد الهادي
يا اللي عليك قصد الغنوادي ( الغنوة دي أو هذه الاغنية )
لما الشعب يقوم و ينادي
يا إحنا يا هما في الدنيا دي
حزر فزر .. شغل مخك
شوف مين فينا حيغلب مين
وقبل ما اقول انتظر تعليقاتكم اللى عاوز يضيف على البوست من عنده يضيف المرة دى الموضوع ميخصنيش لوحدى ولا هو حدوته من حواديتى اللى بيحكيهالكم كله لازم لازم لازم يتكلم
انتظر تعليقاتكم
*******************************************